الواوي--ابن اوى
ويسمى ايضا ابو الويو او حصيني وجمعه واويه وللبغداديين في الواوي بعض المعتقدات الخاصة منها :اذا عارض الواوي طريق المسافر فأن ذلك بشير السعادة وقد نوه الملا عبود بذلك قائلا
اذا يعرضله أرنب هذا عرضة شر ****والواوي ابعرضته تكثر الخيرات
وتتخذ الامهات البغداديات من الواوي ذريعة لتخويف اطفالهن فاذا ارادت احداهن ان تحمل طفلها على النوم بسرعة قالت له (يمه جا الواوي)فعندئذ يدفن الطفل رأسه في صدر امه لحظة يكون اسير سلطان الكرى
ويتناول البغداديون قصصا كثيرة عن مكر ابو الويو ودهائه تقصها الامهات على مسامع الاطفال قبيل النوم منها
أكو ماكو فد واوي ..جان كلش جوعان ..شاف فد غراب اموكر على الشجرة نام الواوي ونفخ بطنه وسوه روحه ميت نزل الغراب على الواوي عباله صدك فطيسه وكام اينكر بلشة الواوي لما وصل يم حلكه ....جان ايفك الواوي حلكه او يكمش الغراب .الغراب هم شيطان وحيال ...قال للواوي أوكف أوكف انت شسمك؟؟ ابو الويو لو ابو الواو ؟؟ فأجابه الواوي :اسمى ابو الواو ..وعندما فتح فمه عند لفظة
(واو ) طار الغراب ونجى بنفسه الا ان الواوي الجوعان ما جاز منه لحكه او هم سوه روحه ميت نوبة اللخ ونام جوه الشجرة الموكر عليها الغراب ..والغراب هم جان جوعان ونسه ذيج الدكه مال الواوي وعباله هاي فطيسه من صدك فنزل عليها وكام اينكر بيها ولما وصل يم كلك الواوي جان الواوي يكمشه بسنونه فعاد الغراب مستفسرا من الواوي عن اسمه الصحيح أهو ابو الواو أم ابو الويو ؟؟وهنا فطن الواوي الى حيلة الغراب فاجابه (ابو الوي......و )وانبت اسنانه في جسم الغراب وكأن ألذ غذاء له بعد العذاب
وقد ذكر البغداديون الواوي بأمثالهم فقالوا
اذا شيب السبع تضحك عليه الواويه *
ان جان انت حصيني اني اذويلك *
أتحزم للواوي بحزام سبع *
اتعلم الواوي على أكل الدجاج *
ماكو زور يخله من الواويه *
كالوله للواوي هالليلة نام ويالدجاج كال أخاف ينكروني *
مثل الواوي جسر خواف *
مثل واوي الدجاج ينام وذيله بالفقص *
مثل واوي الزفه *
واوي الهايم ولاسبع النايم *
واوي عتيك -- من الكنايات
ليست هناك تعليقات:
إرسال تعليق