الحــزورة

الحـــــزورة

الحزورة في معناها البغدادي -اللغز-وهي مادة اللهو في السمر والتعلولة اذ يستهلك الوقت بها وبطائفة من السواليف والحكايات والاحاديث الممتعة. وتمتاز الحزورات الشعبية بالبساطة والعمق لانها مستنبطة من الحياة التي يعيشها واضع اللغز , كما تمتاز بطغيان السجع على تركيبتها , واذا اهتدى المرء الى حل اللغز عجب كل العجب من براعة واضع اللغز نفسه وتوفيقه في اختيار الكلمة التي تفتح مغالق الحزورة والى القارئ هذة المجموعة من الحزورات البغدادية المتداولة مع حلولها

*كبة أمي أمزوكهْ واموكهْ أو بيها الدفوف امعْلكة.......الجواب التنور

*ابيض بياضاني بسوكْ لاكاني آني تفاح العجم حطوني بالصواني آني اي آني لع آني أمبيض الخلع كلمن اجه حل جيسهْواشتراني...الجواب الصابون

*هَل طولاتهْوهل ترللي(مع الاشاره الى شئ صغير واخر طويل يقوم بها السائل).....الجواب ابرهة وخيط

*هوّابكد الفندكه أو أله ميت عين امبحلقه.....الجواب كشتبان

* صندوك جانه من الشام اتلكتـــه ساده وعلام......الجواب شهر رمضان

*طلع من الكبر وكصابيه خُضُر.....الجواب بصل اخضر

*يطلع من بطن امه ويحك ظهر ابوه .....الجواب الشخاطه

*ياكُل مينكال.......الجواب النار

*بطنه بيضه وظهره اسود ..........الجواب القدر

*هُو مالك والناس تستعملهْ أكثر منك ........الجواب الاسم

*وين متْروح هُو وراك...........الجواب الظل

*صْفط أبطن صُفط ليلوُ ومْصفّطْ..........الجواب الرمان

*اسود اسود مثل الجير يكمز كمزات الخنزير..............الجواب برغوث

*جاي من البصره خفيف ابيض وعُراه من ليف............الجواب زنبيل

*طير طار شك ابحار لاله ريش ولامنكار ............الجواب دخان

*اذا اكلت نُصهْ اتموت واذا أكلتهْ كُلّه متموت...........الجواب سمسم

*صندوك سيدي صمدي منقوش نقش العمدِ كلما لزمته بيدي تفتت كبدي ............الجواب القرآن الكريم

*طبر طقش طبر طقش بلا حنه ولانقش اجه حسهُمن بعيد جنه جناجل العيد ............الجواب الهاون

*بنت الملك لابسه ألف تنوره...........الجواب اللهانه

*بيضه بُضبُضه تلمع لميع الفُضه لاصاغها صايغ ولالبستها حُره...........الجواب القمر

*طاسه ابطن طاسه بالبحر غطاسه .........الشمس

*سفينة عمي عباس امحمله كلها اجراص ......الجواب الدف

*كبتنا حناحين بيهه مطر بيهه طين بيهه اثنعش شنداخه كل شنداخه بتلاثين .............الجواب السنه

*جانه خُطار من ديرة مابيها أغبار كاعد على سكمليين ما ناجرهن نجار وشرب من حوضين مامحميات بنار........المولود حديثا

*أذبه من المنارة للكاع مينكسر أذبه بالمي ينكسر ........الجواب الكاغد اى الورقه

*اثنين واتلاثين عروسه بيضه وابنصهن عريس احمر...............الجواب الاسنان واللسان

*عشره وعشرتين وبكدها مرتين أو خمسة واتلاثه وثنين ............الجواب مئه

*هِرف هرف للشط أووكف ............الجواب الحذاء

*حازك لازك أبكل شئ لازك..........الجواب الاسم

*راسه جرص ذيله مكص ظهره فحم بطنه شحم .............الجواب سند وهند

*أسود سويداني بالسوك لاكاني اعمامته خضره والخلقه رباني ............الجواب الباذنجان

*اذا كصيت راسه طار.............الجواب قطار

*الميت من خشب وتابوته حلاوه.............الجواب فردة التمر

*لابس أسود مو حزين بيده سبحه موخيّر يضرب أبره مو طبيب............الجواب عقرب

*أربعة جرخ مرخ واثنين عنطزلري أوواحد ايكش الذبان ............الجواب الحمار